ხელსაწყოთა ერთიანი ცვალებადი ზოლი
Supernova წარმოდგენილია ერთიანი ცვალებადი ზოლით, მასზე თავსდება ხშირად გამოყენებული და გასახსნელ მენიუში არსებული შესაძლებლობები ჩანართის მიხედვით ანდა არეებისა, რომლებიც ამჟამადაა მოქმედი. სრულად აიღეთ მართვის სადავეები ხელსაწყოებისა და ფანჯრების განლაგების სურვილისამებრ მორგებით თქვენი საქმიანობის შესაფერისად.
უმშვენიერესი ხატულები
გარდა განახლებული იერსახისა, Supernova-ს მოჰყვება ულამაზესი ხატულები, რომლებიც მეტადაა შეხამებული Thunderbird-ის გამორჩეულ გარეგნულ მახასიათებლებთან. ახალი იერსახე ინარჩუნებს სიმკვეთრესა და სიზუსტეს ნებისმიერი გარჩევადობის მითითებისას.
სიმჭიდროვის ადვილად ცვლა
გიწევთ მუშაობა რამდენიმე ეკრანთან სხვადასხვა გარჩევადობით? Supernova საშუალებას გაძლევთ მიუთითოთ გამოსახულების შესაფერისი სიმჭიდროვე და შრიფტის ზომა მთელ პროგრამაში, მხოლოდ ერთი დაწკაპებით მენიუდან.
იოლად მოსახმარი მენიუ
პროგრამის ახალი მენიუ (≡) Supernova-ში უკვე კლავიატურითაა ხელმისაწვდომი და გადამუშავებულია უფრო სწრაფი და ადვილი გადაადგილებისთვის. ნაკლები ქვემენიუები, მუდმივი საერთო პარამეტრები და სათანადო ხატულები – ერთად ქმნის მეტად მოსახერხებელ გარემოს.
ახალი + დასალაგებელი საქაღალდეები
Supernova უკეთ მართვის საშუალებას გაძლევთ დასალაგებელი საქაღალდეთა რეჟიმებით. გამოაჩინეთ ყველა თქვენი ჭდე საქაღალდეთა არეში, აამოქმედეთ ან გააუქმეთ ადგილობრივი საქაღალდეები, ანდა გადაადგილეთ რჩეულ საქაღალდეთა განყოფილებები ზემოთ და ქვემოთ ერთი წკაპით. ეკრანის ნაკლები მოძრაობა, მეტი შედეგიანობა.
ახლებური საბარათო ხედი
Supernova-ს ახალი საბარათო ხედი საყოველთაოდ ცნობილი შვეული განლაგების ჩვენებური სახესხვაობაა წერილთა ნუსხისთვის, ზედგამოჭრილი თანამედროვე ვებფოსტის მომხმარებელთათვის. საბარათო ხედი იმეორებს მობილური გარსის მრავალხაზიან განლაგებას, მეტად მოსახერხებელი იერსახის შემოთავაზებით გონების ნაკლებად დასატვირთად.
გაუმჯობესებული წიგნაკი
Supernova განაგრძობს მისამართების წიგნაკის გათანამედროვებას, რომელიც გამოჩნდა Thunderbird 102 გამოშვებაში. ისიამოვნეთ ახალი ცხრილური ხედით, გაუმჯობესებული ჩასწორების ხედით, წაშლის ღილაკებითა და დახვეწილი თავსებადობით.
გაფართოებული თავსებადობა
Supernova მნიშვნელოვნად აუმჯობესებს Thunderbird-ის კლავიატურით გამოყენებასა და ეკრანის წამკითხველებთან თავსებადობას მთლიან პროგრამაში. აგრეთვე, საკმაოდ დაიხვეწა წერილის შიგთავსზე გადაადგილებისა და ღილაკების გამოყენების შესაძლებლობა TAB-ისა და ისრების კლავიშებით.
კალენდრის გაუმჯობესებული იერსახე
Thunderbird-ის კალენდრის გათანამედროვეობისა და განახლების მიმდინარე ძალისხმევის შედეგად, Supernova ნერგავს გაუმჯობესებულ „თვეების მცირე” განლაგებას, დახვეწილი დღის/კვირის/თვის ბადით, მომხიბლავი ფერებითა და არაერთი მეორეხარისხოვანი ცვლილებით.
ბევრი სიახლე წინაა!
Supernova განუწყვეტლივ ვითარდება. მომდევნო წლის განმავლობაში მრავალი სახის გაუმჯობესებას მიიღებს Supernova არსებულ შესაძლებლობებში და ბევრი ახალიც დაემატება. გადადით 115 ვერსიაზე და გამოცადეთ მომავლის Thunderbird!